काठमाडौं — निर्वाचन आयोगले आगामी फागुनको अन्तिम साता स्थानीय तहको निर्वाचन सम्पन्न गर्ने गरी आन्तरिक तयारी अघि बढाएको छ।

निर्वाचन आयोगका आयुक्त राजीव सुब्बाका अनुसार स्थानीय तहका वर्तमान जनप्रतिनिधिको कार्यकाल सकिनुअघि नै निर्वाचन सम्पन्न गर्नुपर्ने कानुनी व्यवस्थालाई आधार बनाएर आयोगले आवश्यक तयारी गरिरहेको छ। आयोगले मतदाता नामावली अद्यावधिक, निर्वाचन व्यवस्थापन तथा सरकारसँग आवश्यक समन्वयका काम अघि बढाइरहेको जनाएको छ।

स्थानीय तह निर्वाचन ऐन, २०७३ मा गाउँ सभा वा नगर सभाका सदस्यको निर्वाचन सम्बन्धित सभाको कार्यकाल समाप्त हुनुभन्दा दुई महिनाअघि गर्नुपर्ने व्यवस्था छ। २०७९ वैशाख ३० गते स्थानीय तहको निर्वाचन भएको थियो। संविधानअनुसार स्थानीय तहका निर्वाचित जनप्रतिनिधिको कार्यकाल पाँच वर्षको हुने भएकाले आयोगले सोही कानुनी व्यवस्थालाई आधार बनाएर फागुनमा निर्वाचन गर्ने तयारी अघि बढाएको हो।
आयुक्त सुब्बाका अनुसार हाल मतदाता नामावली अद्यावधिक गर्ने काम भइरहेको छ। फागुनमा निर्वाचन हुने अवस्था बनेमा माघमा पुनः मतदाता नामावली अद्यावधिक गरी अन्तिम मतदाता नामावली प्रकाशन गर्ने तयारी आयोगको छ।

आयोगले स्थानीय तथा प्रदेशसभा निर्वाचनमा अन्तरजिल्ला मतदानको व्यवस्था सुरु गर्ने सम्भावनाबारे पनि अध्ययन गरिरहेको जनाएको छ। प्रविधिमा आधारित निर्वाचन प्रणालीतर्फ अघि बढ्ने क्रममा केही जिल्ला तथा निर्वाचन क्षेत्रबाट यसको सुरुवात गर्ने विषयमा अध्ययन भइरहेको आयोगको भनाइ छ। विदेशमा रहेका नेपालीका लागि दूतावास वा नियोगमार्फत विद्युतीय मतदानको सम्भावनाबारे समेत अध्ययन भइरहेको छ।

यद्यपि, फागुनको कुन दिन निर्वाचन गर्ने भन्ने औपचारिक निर्णय भने भइसकेको छैन। आयोगले आफ्नोतर्फको तयारी अघि बढाए पनि निर्वाचनको निश्चित मिति तोक्न सरकारसँग आवश्यक समन्वय र सम्बन्धित कानुनी प्रक्रिया पूरा हुन बाँकी रहेको छ। त्यसैले अहिलेको अवस्थामा फागुन अन्तिम साता निर्वाचन हुने आयोगको तयारीलाई औपचारिक निर्वाचन मिति घोषणा भएको रूपमा बुझ्न मिल्दैन।

आगामी स्थानीय तह निर्वाचनमा मतदाता नामावली, मतदान व्यवस्थापन, प्रविधिको प्रयोग र सम्भावित अन्तरजिल्ला मतदानजस्ता विषयले निर्वाचन व्यवस्थापनमा नयाँ अभ्यासको सुरुवात गर्ने देखिएको छ।