​सुनसरी — श्रम संस्कृति पार्टीका अध्यक्ष तथा सुनसरी क्षेत्र नम्बर १ का प्रतिनिधि सभा सदस्य हर्क साम्पाङले आफ्नो निर्वाचन क्षेत्रमा चालू आर्थिक वर्षका लागि शहरी विकासतर्फ २ अर्ब ८ करोडभन्दा बढी बजेट विनियोजन भएको जानकारी दिएका छन्।

​सांसद साम्पाङले सामाजिक सञ्जालमार्फत बजेटको विवरण सार्वजनिक गर्दै आफ्नो निर्वाचन क्षेत्रभित्र पर्ने धरान उपमहानगरपालिका, बराहक्षेत्र नगरपालिका र रामधुनी नगरपालिकाका लागि उक्त रकम विनियोजन भएको सहर्ष जानकारी गराएका हुन्।

​सार्वजनिक विवरण अनुसार शहरी विकास मन्त्रालयबाट धरान उपमहानगरपालिकाका लागि रु. १ अर्ब १७ करोड २२ लाख, बराहक्षेत्र नगरपालिकाका लागि रु. ४९ करोड ८८ लाख र रामधुनी नगरपालिकाका लागि रु. ४१ करोड १२ लाख रकम स्वीकृत भएको छ।

​खानेपानी र पूर्वाधारमा थप बजेट आउने

​सांसद साम्पाङका अनुसार यो बजेट केवल शहरी विकासको शीर्षकमा मात्रै विनियोजन भएको रकम हो। खानेपानी, पुल-पुलेसा तथा अन्य भौतिक पूर्वाधार निर्माणका क्षेत्रमा थप बजेट विनियोजन भइसकेको र अन्य मन्त्रालयहरूबाट परेका बजेटको विवरण पनि चाँडै सर्वसाधारणमाझ सार्वजनिक गरिने उनले बताएका छन्।

​नेपालमा सञ्चालित श्रम संस्कृति अभियान र आत्मनिर्भर विकास मोडलका कारण चर्चामा रहने साम्पाङले नागरिकलाई सुसूचित गराउने र विकास बजेटको पारदर्शिता कायम राख्ने उद्देश्यले बजेट विवरण सिधै जनतामाझ ल्याएको बताएका छन्।

​